Allen den gheenen die desen onsen openen letteren zullen sien ofte hooren lesen saluyt. Doen wij burgermeesteren
ende raide der stede van Aemstelredamme te wetenen certificerende voorde waerheyt dat voir ons gecompareert zijn
deersaeme ende discrete Dirck Meynertszoon ende Cornelis Willemszoon van Rijck onse medebroeders in Raide ende Nanninck
Pieterszoon, dienaer vander Weescamere deser stede, met rechte verdaecht omme der waerheyt getuychnisse
te geven ten versoucke vande erffgenamen van wijlen Cornelis Corneliszoon van Oetwael s.g. Ende hebben bijde
eede bij henluyden int aennemen van hoeren officien respective gedaen, verclaert getuycht ende gedeposeert. Eerst
de voors. Dirck meynertszoon ende Cornelis Willemszoon dat zij getugen opden vijff ende twintichsten dach deser
tegenwoerdiger maent january des morgens omtrent acht uren gesien, gevisiteert ende in hoeren handen gehadt hebben
den rentebrieffve van elff Karolus gulden siaers ter lossen den penninck achtien by Jan everszoon van Husom tot behouff
vanden voirsc. Cornelis Corneliszoon voir schepenen deser stede gepasseert. Ende aen dese certificatie gevesticht ende
dat ten voorsc. Tyde de voirsc. Briefve gansch gave ende wel besegelt was derfuende alle suspicie van bedroch. Ende de
voirnoemde Nanninck Pieterszoon dat hij getuge als voocht van Henrick de zoone vanden voirn. Jan Evertszoon van Husom den rente
van elff gulden siaers tijden voirß Brieve gespecificeert vanden jaere zeven ende tsestich lestleden totten jaere van tweentseventich
beyde incluys betaelt ende uuytgekeert heeft ende alsulcx wel weet dat de voirß schult deuchdelijken ende de rentebrieff
ongelost es. Voorts es voir ons gecompareert Claes Pieterszoon eertijts vader ofte regent vanden Leprosenhuyse buyten deser stede out
omtrent LXX jaeren rechtaen verdaecht omme te geven getuychnisse der waerheyt ten versoucke als vooren. Ende affirmeerde by synen eede
dat hij getuge den voirß rentebrieff lange jaeren in zijn bewaeringe heeft gehadt ende ten versoucke vanden voirß erffgenamen ende mit henlud
opden voirß vijfentwintichsten deser maent wesende den feestdach van Conversionis Pauli des morgens omtrent acht uren geveylt heeft te
vercopen den regenten van sinte Pietersgasthuys dewelcke den selven brieffve visiteerden ende wel besagen. Ende daer nae taendeel vandien
den voirn. erfgenamen toecomende costen oft tot behouff vanden voirß gasthuyse overnamen waer nae hij getuge metten voirß rentebrief
gegaen es in doude parochykercke hooren aldaer den dienst vanden hocchmisse, waer nae hij gaende vander plaetse daer hij geseten hadde
den voirß brief onverdachtelick heeft laten leggen ende vergeten mede te nemen. Ende onlancx daer nae missende den voirß brieve wederomme
gekeert es totter plaetse inde voirß Kercke daer hij den voirß dienste Godts gehoort hadde souckende naeden selven briefve sonderdien te vinden.
Soe dat hij mitten voirß saecke beswaert zijnde den voirß brieff ten selven dage heeft gedaen omme roupen ende oick opden naemiddage opden
preeckstoelen inder kercke voirsc. ende ter minderbroeders kundigen omme inden costers handen vander kercke voirß gebrocht te werden.
Waer nae een dach off twee geleden de voirß brieff te voirschijn gebrocht es geweest by eenen jonge oudt omtrent twaelff jaeren genaempt
Symon Gerytszoon. Soe waerlicken most hen getugen God helpen ende alle synen heyligen. Mede es voir ons gecompareert
de selve jone met Marten Symonszoon, zynen oom, bekennende deselve jonge dat hy den voirß briefve inder voirß kercke opden voirn.
feestdach genomen ende twasse vande segelen van dien heeft uuyt simpelheyt off gedaen. In kennisse der waerheyt hebben wy
der voirß stede van Aemstelredamme segele ten saekcken beneden aen desen doen hangen. Gegeven den dertichsten [onder de pliek]
